Më poshtë gjeni disa këshilla për menaxhimin e stresit marrë nga organizatat e besueshme të shëndetit mendor si Shoqata Amerikane e Psikologjisë (APA), Instituti Kombëtar i Shëndetit Mendor (NIMH), dhe Organizata Botërore e Shëndetësisë (OBSH):
Ushtroni rregullisht: Aktiviteti fizik rrit endorfinat, lehtësuesit natyralë të stresit në trup. Aktivitetet si ecja, yoga ose ushtrimet aerobike mund të ndihmojnë në uljen e nivelit të stresit dhe përmirësimin e humorit. Nëse jeni të zënë dhe të ngarkuar për të ushtruar, Mayo Clinic rekomandon që të vendosni qëllime të arritshme që nuk marin shumë kohë. Një ecje 10 minutëshe gjatë orarit të drekës tre herë në javë ose të shikoni video ushtrimesh online në shtëpi, do të ju ndihmojnë jashtëzakonisht shumë në luftën ndaj stresit. Një tjetër strategji e mirë është të gjeni një mik për të ushtruar bashkë. Kjo mund të rrisë motivimin dhe angazhimin.
Krijoni një rutinë të shëndetshme: Mbajtja e një regjimi të rregullt gjumi, zakoneve të ushqyerjes dhe kohës për relaksim ndihmon trupin të përballet më mirë me stresin. Shmangni teprimin e kafeinës ose alkoolit, të cilët mund të rrisin stresin. Ju mund të zëvendësoni përdorimin e kafeinës me çajra me efekte relaksuese.Gjithashtu qëndrimi në natyrë dhe ruajtja e një rutine të shëndetshme ndihmojnë në uljen e stresit dhe përmirësimin e humorit. Koha e kaluar në hapësira të gjelbra, si parqe dhe kopshte, ul nivelin e kortizolit dhe përmirëson presionin e gjakut.
Kufizoni kohën para ekranit dhe mbingarkesën me informacion: Ekspozimi i vazhdueshëm ndaj lajmeve dhe rrjeteve sociale mund të rrisë stresin, veçanërisht nëse është negativ. Vendosni kufij për përdorimin e pajisjeve digjitale dhe bëni pushime të rregullta nga ekranet. Një mënyrë e mirë për ta arritur këtë qëllim është të vendosni limitime në përdorimin e aplikacioneve të ndryshme në telefonin tuaj.
Krijoni një rreth social me njerëz mbështetës: Biseda me miqtë, familjarët ose profesionistët e shëndetit mendor ofron mbështetje të madhe emocionale. Lidhjet sociale ndihmojnë në zvogëlimin e efekteve të stresit. Caktoni takime të shpeshta me shoqëri, ku mund të konsumoni pije dhe ushqim duke biseduar rreth situatës në të cilën ndodheni.
Praktikoni mirënjohjen: Përqendrimi në aspektet pozitive të jetës, si gjërat për të cilat jeni mirënjohës, mund të ndihmojë në ndryshimin e perspektivës suaj. Mbajtja e një ditari ku mund të shkruani falënderimet e juaja është një mënyrë për të kultivuar të menduarit pozitiv, që ndikon në uljen e stresit.
Krijoni një ambient relaksues: Për të reduktuar stresin, organizoni hapësirën tuaj të jetesës ose të punës, duke eliminuar rrëmujën dhe shtuar elemente qetësuese, si ndriçim të butë, muzikë relaksuese ose bimë. Kjo ndihmon në krijimin e një ambienti të rehatshëm dhe paqësor. Njëkohësisht, të qenit i adaptueshëm ndaj ndryshimeve ose sfidave ju lejon të gjeni zgjidhje të reja dhe të zvogëloni ndjenjat e frustrimit dhe ankthit. Fleksibiliteti në qasje përballë sfidave forcon aftësinë për t’u përballur me situata të vështira.
Delegoni detyrat dhe kërkoni ndihmë: Kur jeta bëhet rraskapitëse, mos hezitoni të delegoni detyra ose të kërkoni mbështetje nga të tjerët. Kjo mund të zvogëlojë ngarkesën tuaj dhe të parandalojë akumulimin e stresit. Ndryshe nga çka supozohet ndonjëherë, personat e dashur nuk hezitojnë të ofrojnë ndihmë kur është e nevojshme. Një shembull I mirë është që kur ndjeheni të stresuar dhe nuk gjeni motiv për të përgatitur ushqim, kërkoni nga familjarët ose edhe dikush nga shoqërija që të përgatise diçka për ju, ose planifikoni të vizitoni një restaurant.
Kërkoni ndihmë profesionale nëse është e nevojshme: Nëse stresi bëhet dërrmues dhe kronik, mos hezitoni të bisedoni me një terapist ose këshillues I cili do të ju ndihmojë në gjetjen e një strategjije për përballimin e tij. Terapia CBT është një qasje efektive që ndihmon në ndryshimin e modeleve negative të mendimit. Kjo terapi është dominante nga qasjet për trajtimin e problemeve psikosociale, siç ceket edhe nga Institutiti Kombëtar për Shëndetin dhe Kujdesin (NICE) si dhe Shoqatës Amerikane të Psikologjisë (APA).
Duke kombinuar këto strategji dhe duke gjetur kohë që të prioritizoni veten në luftën ndaj stresit, mund të menaxhoni efektivisht stresin si dhe të përmirësoni shëndetin tuaj mendor dhe fizik.
Autore: Blerona Iljazi
